Rev 13 | MED | STEP | Wote, na kundᵾr ei, mel rakra ti, num kuta ila oⱡa urum. Mel ei nga peng 7 anggilpa, kom 10 ᵾnggᵾtᵾm. Kom 10 kᵾⱡ ila nga, wu nuim mumuk mbᵾ nga wᵾnᵾ mondurmin nimba nga murum. Wote, peng 7 ni kᵾⱡ ila, mbi mat murum mbᵾ ndi, Got nga nimba kit mundrum.

Revelation of John 13

Mel Rakra Raⱡ Oⱡa Orᵾnggil.

1 Wote, na kundᵾr ei, mel rakra ti, num kuta ila oⱡa urum. Mel ei nga peng 7 anggilpa, kom 10 ᵾnggᵾtᵾm. Kom 10 kᵾⱡ ila nga, wu nuim mumuk mbᵾ nga wᵾnᵾ mondurmin nimba nga murum. Wote, peng 7 ni kᵾⱡ ila, mbi mat murum mbᵾ ndi, Got nga nimba kit mundrum. 2 Mel rakra na kundᵾr ei, kui lepat mel itim. Kᵾmp mbᵾ, kng ber mel elinga, keta ei kui laiyon mel itim. Wimbᵾ ni nga ronduⱡ ei, mel rakra ni ngumba, elim nga rᵾpᵾndi pol ei kᵾn, wote wamp rᵾp iti ronduⱡ mam ei ngurum ku. 3 Mel rakra ni nga peng tenda ti, rorung kona ei ur titim. Ei kᵾn, mel rakra ni nga kona orᵾⱡa ei, mᵾi kona wamp mbᵾ pora kandᵾk, min ngᵾn mundᵾk, pep rok akil tetᵾng. 4 Wamp mbᵾ ndi pora, wimbᵾ ei nga mbi paka rondrᵾng. Ei nambuⱡ emel, wimbᵾ mam ni nga ronduⱡ ei, mel rakra ei ngurum. Wote, mel rakra ni nga kunda, mbi paka rondᵾk nᵾk mel, “Wamp nam ti, mel rakra ei mel, kapⱡa murum? Wamp nam ti, mel rakra ei kᵾn, el romba?” nᵾtᵾng.

5 Ni kᵾn, mel rakra ei, ik kit nimba, elim nga ronduⱡ ei, tepa kongun itangga, kalimp 42 omba pangga nimba, Got ndi, kandpa kui itim. 6 Mel rakra ei ndi, keta anga ropa, Got kᵾn, Got nga mbi kᵾn, elim nga kona morum ei kᵾn, wote wamp muⱡ kona mormin mbᵾ kᵾn pora, ik kit nimba ngurum. 7 Got ndi kandpa, wak rangga kᵾn, elim nga wamp mbᵾ kᵾn el ropa, wamp mbᵾ ropa mana ndumba. Ronduⱡ ti tᵾpa kᵾn, mᵾi kona mbila wamp rᵾⱡaip na, kᵾng elpa elpa kulk ik nᵾk etmin wamp mbᵾ nga pora, nuim mumuk moⱡᵾp rᵾp itimp nimba itim. 8 Mᵾi kona wamp mbᵾ ndi pora, mel rakra ei nga mbi paka runding. Wote, wamp mat ndi, mbi paka rundi nᵾnding. Ei nambuⱡ emel, muⱡ mᵾi raⱡ mim iti nᵾti kᵾn, wamp mbᵾ nga mbi ei, Sipsip Waⱡ unt rok kondrung ei nga kont mba mul, buk ila mbi morum. 9 Ei nga, wamp nam ti, kum nombuⱡa tem ndam, ik ei pilik kai itᵾi! 10 Wamp nam ti, kan manga ila mbi nimba pilim ndam, kan manga ila pangga! Wamp nam ti, kur koiya ila kuⱡimp nimba pilim ndam, kuⱡangga ku. Uⱡ mbᵾ enim, Got nga wamp rᵾⱡaip mbᵾ kᵾn, om ndam, enim nga mondpa pili uⱡ ei, ambulk gi nduk muⱡᵾi!

11 Wote, na ndi kundᵾr ei, mel rakra ti mᵾi ila oⱡa urum. Wote, mel ei nga kom raⱡ, kng sipsip waⱡ ei nga gu ni mel, raⱡ ᵾnggᵾtᵾm. Wote, ik nᵾtᵾm uⱡ ei, wimbᵾ kunt nga ik ni mel nitim. 12 Mel rakra akil tepa ni ndi, mel rakra kuimp tepa ni nga ronduⱡ ei, tᵾpa kuimp keta ila kongun ronduⱡ mundpa itim. Mᵾi kona mbila wamp mbᵾ kᵾn, kongun ronduⱡ mundpa elinga, mel rakra kuimp tepa ni nga unt kᵾng iti itim kona ni, ur kurum ni nga mbi paka rondrᵾng. 13 Mel rakra akil tepa ni ndi, uⱡ rᵾpᵾndi elpa elpa mam mat itim. Uⱡ rᵾpᵾndi ti itim ei, wamp morung kuimp keta mbila nga, muⱡ ila ndip mat, etpa mᵾi kona ila mana elinga kandurmᵾn. 14 Got ndi, mel rakra ei kandpa, wak roⱡnga kᵾn, mel rakra kuimp tepa ei nga kuimp keta ila nga uⱡ rᵾpndi elpa elpa mbᵾ itim. Uⱡ ei ndi, mᵾi kona mbila wamp mbᵾ kᵾn, ik kol ropa, nimba mel, “Mel rakra kuimbal ei, unt koiya ndi, rok kondrung. Wote, akup kont morum ei nga to tᵾndᵾk mel ti, mim etᵾk mondᵾk tᵾk ou nduk mbi paka rundᵾi!” nitim. 15 Got ndi, mel rakra akil tepa ni, kandpa wak roⱡnga kᵾn, mel ti mim etᵾk mondrᵾng ni, muⱡnga kont ei, pop ropa ruk nduⱡnga kᵾn, nde mel mim etᵾk ni, ik nitim. Wamp mat ndi, mel mim etᵾng ei nga, mbi paka rundi nandᵾng wamp mbᵾ, ropa kondᵾmba. 16 Mel rakra akil tepa ni ndi, ik ti nilinga kᵾn, tip timal ti, wamp mbᵾ nga pora, ki mbo orunga na, mᵾi ombil na mbila pendᵾtᵾng. Uⱡ etᵾng ei, wamp ou na, kel na, mbi mul wamp na, wamp kurpa na, kng mel pi wamp na, kindmant kongun wamp na, wote nuwa murmin wamp mbᵾ kᵾn, pora etᵾng. 17 Ei nga, wamp nam ti, mel rakra ei nga tip timal ei, elim nga mbi ei, kuimp keta ila muⱡi nambᵾⱡᵾm ndam, wamp ei ndi, wamp mbᵾ nga mel mbᵾ, rarᵾp ropa ti nᵾtangga kᵾn, wote wamp mbᵾ ndi, wamp ei nga mel mbᵾ, rarᵾp rok ti nᵾting ku.

18 Tᵾn wamp mbᵾ ndi, uⱡ ei pilpᵾn, kai etamᵾn! Wamp nam ti nga pilpa kungᵾndi ei ndi, mel rakra ei nga mon mbᵾ, kᵾmp rok kai etᵾk pilᵾi! Nambuⱡ emel, mon ei, wamp ti nga mbi tetmin. Wu ti nga mbi ei, 666 nitmin.